डिजीटल आदिवासी हस्तकला मेळो

कला आनी संस्कृती संचालनालय, पाटो-पणजी, गोंय, आदिवासी कल्याण संचालनालय, पणजी आनी आदिवासी संशोधन संघटना, खैरीकट्टो, सांगे हांच्या सहकार्यान नॅशनल डिजीटल “आदिवासी हस्तकला मेळा” 2025 हें कला अकादमी गोंय, काम्पाल-पणजी-गोंय हांगा 17 जानेवारी ते 26 जानेवारी फोयर एरियेंत भगवान बिरसा मुंडाचे 150वी वर्स (150वी जयंती) मनयतना आयोजीत केल्लें.

ह्या कार्यावळीक भारत सरकाराचे आदिवासी वेव्हार मंत्रालय, नवी दिल्ली ‘आदिवासी संशोधन संस्थेक आदार’ उपक्रमा खाला आदार दिलो. कला आनी संस्कृती संचालनालयाचे संचालक, आदिवासी कल्याण संचालनालयाचे उपसंचालक आनी हेर मानेस्त हाजीर आशिल्ले तशेंच कला आनी संस्कृती मंत्री श्री. गोविंद गावडे हांच्या हस्तुकीं डिजीटल आदिवासी हस्तकला मेळ्याचें उक्तावण केलें. मांडवी न्हंयचे देगेर दर्या संगम हांगाच्या कला अकादमींत 24 व्या लोकोत्सवाच्या भव्य उक्तावणा पयलीं 17 जानेवारी 2025 दिसा सांजेच्या 6 वरांचेर आदिवासी हस्तकला गांव हे रिबन कापून लोकां खातीर आदरणीय सर्गेस्त आदिवासी फुडारी भगवान बिरसा मुंडा हांच्या फोटोक फुलां अर्पण करून उक्तावण केलें.

कला आनी संस्कृती संचालनालयान आयोजीत केल्ल्या लोकोत्सव 2025 वर्सा पयलेच खेपे ही कार्यावळ आयोजीत केल्ली.
आदिवासी हस्तकला, पाककला, साहित्य, वनस्पती वखदां, जैवीक शेतकी उत्पादनां आदीचें प्रात्यक्षीक, विक्री आनी प्रदर्शन करपा खातीर गोंयच्या थळाव्या आदिवासींची 12 स्टॉलां उबारली. गोंयच्या आदिवासी समाजाची पारंपारीक कला वापरून कोंडो आनी कोंड्याच्यो शेंदर्‍यो, मल्लां विणून पर्यावरणपूरक वस्तूंचो वापर करून हीं स्टॉलां उबारिल्ले. प्रवेशदार वेगवेगळ्या प्रकाराच्या बेतानी (बांबूची टोपली) सजयल्ली, जाल्यार कुणबी जोडप्याच्या पारंपारीक पुतळ्यांनी आदिवासी गांवांत येवपी लोकांक येवकार दिलो. कला अकादमी संकुलाच्या प्रवेशदारार एक एलईडी स्क्रीन बसयल्ली, तातूंत एक तरुण आदिवासी विद्वान श्री. देविदास गांवकार हाणें तयार केल्लो ‘लायफ ऑफ गोवा ट्राइब्स’ एक माहितीपूर्ण विशेश व्हिडिओ प्रदर्शीत केल्लो.